ഒരു ബൾബിന്റെ കഥ

ഒരു ബൾബിന്റെ കഥ

ഒരിക്കൽ ഒരു ചേട്ടൻ കടയിൽ പോയി ഒരു പുതിയ ബൾബ് വാങ്ങി.

വീട്ടിലെത്തി സന്തോഷത്തോടെ ബൾബ് ഹോൾഡറിൽ ഘടിപ്പിച്ച് സ്വിച്ച് ഓൺ ചെയ്തു.

ആഹാ! എന്തൊരു മനോഹരമായ പ്രകാശം!

മുറി മുഴുവൻ വെളിച്ചം നിറഞ്ഞു. ചേട്ടന് വലിയ സന്തോഷമായി.

കുറച്ചുകഴിഞ്ഞപ്പോൾ ചേട്ടന് തോന്നി, ഇപ്പോൾ ഈ പ്രകാശം വേണ്ടെന്ന്. ഉടനെ സ്വിച്ച് ഓഫ് ചെയ്തു.

വീണ്ടും സന്തോഷം!

പിന്നീടാണ് ചേട്ടന്റെ മനസ്സിൽ മറ്റൊരു ചിന്ത വന്നത്.

"ഈ ബൾബ് എനിക്ക് ആവശ്യമുള്ളപ്പോൾ മാത്രം പ്രകാശിച്ചാൽ പോരേ? എനിക്ക് ഇഷ്ടമുള്ളപ്പോൾ തെളിയണം, ഇഷ്ടമില്ലാത്തപ്പോൾ അണയണം. ഇടയ്ക്കൊക്കെ ഒന്ന് മിന്നുകയും വേണം!"

ചേട്ടൻ ബൾബിനോട് പറഞ്ഞു:

"ഞാൻ ചിന്തിക്കുമ്പോഴൊക്കെയും നീ ഓണാകുകയും ഓഫാകുകയും വേണം. എന്റെ മനസ്സിൽ തോന്നുന്നതിനനുസരിച്ച് നീ മിന്നിക്കൊണ്ടിരിക്കണം. എനിക്ക് ആവശ്യമുള്ളപ്പോൾ മാത്രം പ്രകാശിച്ചാൽ മതി!"

അപ്പോൾ ബൾബ് ശാന്തമായി മറുപടി പറഞ്ഞു:

"ചേട്ടാ, എന്നെ നിർമ്മിച്ചിരിക്കുന്നത് പ്രകാശിക്കാനാണ്, മിന്നിക്കൊണ്ടിരിക്കാനല്ല. എനിക്ക് തുടർച്ചയായി പ്രകാശം നൽകാനേ കഴിയൂ. ഇങ്ങനെ ഇടയ്ക്കിടെ മിന്നിമറയാനുള്ള ശേഷി എനിക്കില്ല."

പക്ഷേ ചേട്ടന് ആ മറുപടി ഇഷ്ടപ്പെട്ടില്ല.

"ഞാൻ നിന്നെ കാശ് കൊടുത്ത് വാങ്ങിയതാണ്. അപ്പോൾ ഞാൻ പറയുന്നതുപോലെ നീ പ്രവർത്തിക്കണം!"

അങ്ങനെ ചേട്ടൻ സ്വന്തം ഇഷ്ടത്തിനനുസരിച്ച് ബൾബ് ഓണാക്കാനും ഓഫാക്കാനും തുടങ്ങി.

ആദ്യമൊക്കെ ബൾബ് മനോഹരമായി പ്രകാശിച്ചു. എന്നാൽ തുടർച്ചയായുള്ള ഓണും ഓഫും കാരണം പതിയെ അതിന്റെ പ്രകാശം മങ്ങിത്തുടങ്ങി.

അത് കണ്ട ചേട്ടൻ ചോദിച്ചു:

"എന്തിനാണ് നീ ഇങ്ങനെ മങ്ങുന്നത്? എനിക്ക് വേണ്ടപ്പോൾ മാത്രം ഒരു മിന്നൽപോലെ വെളിച്ചം തന്നാൽ പോരേ?"

ബൾബ് സങ്കടത്തോടെ മറുപടി പറഞ്ഞു:

"ചേട്ടാ, ഞാൻ നേരത്തേ പറഞ്ഞതല്ലേ... എന്നെ നിർമ്മിച്ചത് മിന്നിമറയാനല്ല, പ്രകാശിക്കാനാണ്. എനിക്ക് അതിനുള്ള കഴിവേ ഉള്ളൂ."

ചേട്ടന് ദേഷ്യം കൂടി.

"ഞാൻ നിന്നെ കാശ് കൊടുത്ത് വാങ്ങിയതാണ്. അപ്പോൾ ഞാൻ പറയുന്നതുപോലെ നീ പ്രവർത്തിക്കണം!" ചേട്ടൻ ആക്രോശിച്ചു.

അങ്ങനെ ചേട്ടൻ കൂടുതൽ വേഗത്തിൽ സ്വിച്ച് ഓണാക്കാനും ഓഫാക്കാനും തുടങ്ങി.

ബൾബ് മിന്നിമറഞ്ഞുകൊണ്ടിരുന്നു.

ഓരോ തവണയും അതിന്റെ പ്രകാശം കുറഞ്ഞുവന്നു.

"അയ്യോ ചേട്ടാ... എനിക്ക് പറ്റുന്നില്ല... ദയവായി ഇങ്ങനെ ചെയ്യരുതേ..."

പക്ഷേ ചേട്ടൻ കേട്ടില്ല.

സ്വിച്ച് വീണ്ടും വീണ്ടും അമർത്തിക്കൊണ്ടിരുന്നു.

പെട്ടെന്ന്...

ബൾബിന്റെ പ്രകാശം പൂർണമായും നിലച്ചു.

ചേട്ടന് ദേഷ്യം വന്നു.

"എന്തൊരു മോശം ബൾബ്! ഞാൻ പറയുന്നതുപോലെ പ്രവർത്തിക്കാൻ പോലും കഴിയുന്നില്ല!"

അയാൾ ബൾബ് ഊരിയെടുത്ത് നേരെ കടയിലേക്ക് പോയി.

കടക്കാരനോട് ദേഷ്യത്തോടെ പറഞ്ഞു:

"എനിക്ക് ഈ ബൾബ് വേണ്ട. എനിക്ക് ഇഷ്ടമുള്ളപ്പോൾ മാത്രം പ്രകാശിക്കണം. അല്ലാത്തപ്പോൾ എനിക്ക് അന്ധകാരമാണ് ഇഷ്ടം. എന്റെ ആവശ്യത്തിനനുസരിച്ച് മിന്നുന്ന ഒരു ബൾബ് മതി!"

കടക്കാരൻ ശാന്തമായി പറഞ്ഞു:

"സോറി സാർ. ഈ ബൾബ് നിർമ്മിച്ചിരിക്കുന്നത് പ്രകാശം നൽകാനാണ്. ആവശ്യമായപ്പോൾ തെളിയിക്കാനും ആവശ്യമില്ലാത്തപ്പോൾ അണയ്ക്കാനും കഴിയും. പക്ഷേ തുടർച്ചയായി മിന്നിമറയാൻ വേണ്ടി നിർമ്മിച്ചതല്ല ഇത്."

ചേട്ടൻ വീണ്ടും പറഞ്ഞു:

"അതൊന്നും എനിക്കറിയേണ്ട. എനിക്ക് വേണ്ടപ്പോൾ മാത്രം വെളിച്ചം മതി. അല്ലാത്തപ്പോൾ അന്ധകാരം മതി!"

ഒടുവിൽ കടക്കാരൻ ചേട്ടന്റെ ആവശ്യത്തിനനുസരിച്ച് മിന്നിമറയുന്ന മറ്റൊരു ബൾബ് നൽകി.

ചേട്ടൻ അതുമായി സന്തോഷത്തോടെ വീട്ടിലേക്ക് മടങ്ങി.

കടക്കാരൻ കേടായ ബൾബ് എടുത്ത് നിർമ്മാണക്കമ്പനിയെ വിളിച്ചു.

"സാർ, നിങ്ങളുടെ ബൾബിനെക്കുറിച്ച് ഒരു കസ്റ്റമർക്ക് വലിയ പരാതിയാണ്. എന്താണ് ഇങ്ങനെ?"

കമ്പനിക്കാരൻ കാര്യങ്ങളെല്ലാം വിശദമായി ചോദിച്ചറിഞ്ഞു.

എല്ലാം കേട്ടശേഷം അദ്ദേഹം ശാന്തമായി പറഞ്ഞു:

"സാരമില്ല. ആ ബൾബ് ഞങ്ങൾക്ക് തിരികെ അയച്ചുതരൂ. ഞങ്ങളുടെ കമ്പനി പ്രകാശം നൽകുന്ന ബൾബുകളാണ് നിർമ്മിക്കുന്നത്. തുടർച്ചയായി മിന്നിമറയുന്ന ബൾബുകളല്ല."

അദ്ദേഹം തുടർന്നു:

"ആ ബൾബ് ഞങ്ങൾ നന്നാക്കിയെടുക്കാം. അതിന്റെ പ്രകാശം ആവശ്യമുള്ള മറ്റാരെങ്കിലും തീർച്ചയായും ഉണ്ടാകും. കസ്റ്റമർക്കുണ്ടായ ബുദ്ധിമുട്ടിൽ ക്ഷമ ചോദിക്കുന്നു."

അങ്ങനെ കേടായ ബൾബ് കമ്പനിയിലേക്ക് തിരിച്ചെത്തി.

അവർ അത് ശ്രദ്ധയോടെ പരിശോധിച്ചു. കേടുപാടുകൾ പരിഹരിച്ച് വീണ്ടും പ്രകാശിക്കാനുള്ള ശേഷി വീണ്ടെടുത്തു.

പിന്നീട് ആ ബൾബ് ഒരു പൊതുസ്ഥലത്ത് സൗജന്യമായി സ്ഥാപിച്ചു.

അങ്ങനെയിരിക്കെ, ഒരിക്കൽ സ്വന്തം പ്രകാശം നഷ്ടപ്പെട്ട ഒരു യുവാവ് വഴിതെറ്റി ആ സ്ഥലത്തെത്തി.

ഇരുട്ടിൽ ദിശയറിയാതെ അലഞ്ഞുനടന്ന അവൻ ആ ബൾബിന്റെ പ്രകാശം കണ്ടു.

ആ വെളിച്ചത്തിലേക്ക് അവൻ പതിയെ നടന്നടുത്തു.

അവിടെ സംഭവിച്ചത് അത്ഭുതകരമായ ഒരു കാര്യമായിരുന്നു!

ആ പ്രകാശം ഏറ്റുവാങ്ങിയ നിമിഷം മുതൽ അവന്റെ ഉള്ളിലും ഒരു വെളിച്ചം തെളിയാൻ തുടങ്ങി.

പതിയെ അവനും പ്രകാശിക്കാൻ തുടങ്ങി!

ഒരിക്കൽ പ്രകാശം നഷ്ടപ്പെട്ട് ഇരുട്ടിൽ അലഞ്ഞുനടന്ന ആ യുവാവ് ഇപ്പോൾ മറ്റുള്ളവർക്ക് വെളിച്ചമായി മാറിയിരുന്നു.

അവൻ നടന്നുപോയ വഴികളിൽ ആളുകൾ അവന്റെ പ്രകാശം ശ്രദ്ധിച്ചു.

അത്ഭുതത്തോടെ അവർ ചോദിച്ചു:

"നിനക്ക് ഈ പ്രകാശം എവിടെനിന്നാണ് ലഭിച്ചത്?"

അവൻ തനിക്ക് പ്രകാശം ലഭിച്ച സ്ഥലത്തെക്കുറിച്ച് അവരോട് പറഞ്ഞു.

അത് കേട്ട മനുഷ്യർ ആ പ്രകാശത്തിന്റെ ഉറവിടം തേടി ഓടിയെത്തി.

ആ ബൾബിന്റെ പ്രകാശം തേടി കൂടുതൽ മനുഷ്യർ വരാൻ തുടങ്ങി.

ഇരുട്ടിൽ വഴിതെറ്റിയവർക്ക് അത് വഴികാട്ടിയായി.

പ്രകാശം നഷ്ടപ്പെട്ടവർക്ക് അത് പുതിയ പ്രതീക്ഷയായി.

ആ പ്രകാശം ഏറ്റുവാങ്ങിയ മനുഷ്യരുടെ ഉള്ളിലും വെളിച്ചം തെളിയാൻ തുടങ്ങി.

അവരിൽനിന്നും പ്രകാശം മറ്റുള്ളവരിലേക്ക് പ്രസരിക്കാൻ തുടങ്ങി.

അങ്ങനെ ഒരു ബൾബിൽനിന്ന് ആരംഭിച്ച പ്രകാശം അനേകം മനുഷ്യരിലൂടെ പല വഴികളിലേക്കും പടർന്നു.

ഒരിക്കൽ ഒരാളുടെ ഇഷ്ടത്തിനനുസരിച്ച് മിന്നിമറയാൻ കഴിയാത്തതിന്റെ പേരിൽ ഉപേക്ഷിക്കപ്പെട്ട ആ ബൾബ്, ഇന്ന് അനേകരുടെ ജീവിതത്തിൽ വെളിച്ചമായി മാറിയിരുന്നു.

ആ പ്രകാശം പടർന്നുപോയ വഴികളിലൊന്നിൽ, മിന്നിമറയുന്ന ഒരു ബൾബിന്റെ വെളിച്ചത്തിൽ തപ്പിത്തടഞ്ഞുകൊണ്ടിരുന്ന ആ ചേട്ടന്റെ വീടും ഉണ്ടായിരുന്നു...